:

2 Tawarikh 24

Kadatuanna Yoas 1

Iatu Yoas pitung taunmo tonna dadi datu, anna ma’parenta patangpulo taunna dio Yerusalem. Iatu indo’na disanga Zibya, dio mai Bersyeba.

2

Napogau’mi Yoas tu apa malolo dio pentiroNa PUANG temponna tuo tu to minaa Yoyada.

3

Naalammi Yoyada da’dua baine napobaine, tu umpadadianni muane sia baine.

4

Mangkato napamanassami Yoas la umpemeloi banuanNa PUANG.

5

Narampunmi tu mintu’ to minaa sia to Lewi, anna ma’kada lako tau iato mai nakua: La ussalongikomi mintu’ kota Yehuda, ammi rampun doi’ dio mai mintu’ to Israel la umpemeloi banuanna Kapenombammi, ke taunoi. La madomi’komi umpogau’i tu apa iate. Apa tae’ napogau’i to Lewi.

6

Natambaimi datu tu tominaa kapua Yoyada, anna ma’kada lako nakua: Ma’apai natae’ mipoinaai tu to Lewi la umbaai tu pa’padadi napepasanan Musa, taunNa PUANG, tu narampun dio mai Yehuda sia dio mai Yerusalem, susitu napogau’ kombongan to Israel, tu dipake lako tenda kasa’bian.

7

Belanna iatu anakna Atalya, to tang mekaaluk mangka ussanggang banuanNa Puang Matua, sia ia duka tu mintu’ apa maindan lan banuanNa Puang napake lako mintu’ Baal.

8

Napa’pesuammi datu unggaragai misa’ patti, napadioi salian dio babangan banuanNa PUANG.

9

Sia napetamban lan Yehuda sia lan Yerusalem, kumua iatu tau iato mai manassa la unduruk pa’padadi lako PUANG, tu napatanggunganni Musa, taunNa Puang Matua, tu to Israel lan padang pangallaran.

10

Iatu mintu’ pangulu sia to buda iato parannu penaanna; napasidurukmi tu pa’padadi iato, napatamai tu patti sae lako ponnona.

11

Ke nabaaoi to Lewi tu patti lako to diala pareana datu sia natiro tau iato mai budamo doi’ lan, saeomi tu pangulu to massura’na datu sia akkele’na tominaa kapua, nalo’bangi tu patti; mangkato naangka’mi tau, napasule lako inanna. Susimo penggauranna kiallo-kiallo to, anna rampunni tu doi’ lendu’ budanna.

12

Iatu doi’ iato napa’bengan datu sia Yoyada lako to ungkapalai pa’diaman dio banuanNa PUANG sia iamo ussaroi tu pande batu sia pande kayu la ungkassa’i banuanNa PUANG, susi dukato tu pande bassi sia pande tambaga la umpemeloi banuanNa PUANG.

13

Mengkarangmi tu mintu’ to mengkarang, anna samasai-sainna samangka-mangkana tu pengkarangan iato; nakassa’i tu banuanNa Puang Matua unturu’i tu pandiri dolo sia napematoto’i.

14

Iatonna mangka nasangmo tu pengkarangan iato, nabaami tau tu la’binna mintu’ doi’ iato lako olona datu sia Yoyada, na doi’ iamoto tu dipangallian pareanan dipake lan banuanNa PUANG: iamotu parea dipake menomba sia memala’, sia ba’tu pira-pira dolong-dolong sia pareanan senga’ tu bulaan sia salaka digaragai. Tempon tuona Yoyada tontong dipemalaran tu pemala’ ditunu pu’pu’ lan banuanNa PUANG.

15

Matuamo tu Yoyada sia matessekmo namane mate; iatonna mate saratu’ tallungpulomo taunna.

16

Napeliangmi tau lan kotana Daud sisola mintu’ datu, belanna umpogau’mo kameloan lan Israel la lako Puang Matua la lako banuanNa.

17

Apa iatonna matemo tu Yoyada saemi tu mintu’ pangulu to Yehuda menomba lako datu; naperangiimi datu tu tau iato mai.

18

Naboko’imi tau iato mai tu banuanNa PUANG, Kapenombanna nene’ to dolona, sia umpenombai lentong dipodeata sia rapang-rapang dipodeata naurungan narampoi kasengkean kapua tu Yehuda sia Yerusalem napobua’ kasalanna.

19

Nasuami tu ba’tu pira-pira nabi lako tau iato mai, kumua anna pasulei lako PUANG; moi napakilala nabi tu tau iato mai, apa tae’ naperangii.

20

Naponnoi Penaa Masallo’Na Puang Matua tu Zakharia, anakna Yoyada, to minaa, anna bendan dio tingayona to buda anna ma’kada lako nakua: Inde sia tu kadanNa Puang Matua: Ma’apai ammi tengkai tu pepasanNa PUANG, miurunganni tang maupa’? Belanna miboko’i tu PUANG, iamoto la Naboko’i dukakomi.

21

Sipakulu-kulumi tu tau iato mai la umpatei anna leba’i batu tete dio pa’parentana datu lan tarampak banuanNa PUANG.

22

Tae’mo nakilalai datu Yoas tu kamasokanan napogau’ Yoyada, ambe’na, lako kalena, sangadinna napatei tu anakna. Iatonna mateanni tu Zakharia, ma’kadami nakua: Na PUANGmora untiroi sia umpabala’i!

23

Iatonna tituka’mo taun, ke’de’mi tu surodadu Aram ullaoi datu. Rampomi lako Yehuda sia Yerusalem, anna sabu’i tu mintu’ pangulunna to buda dio lu pa’tondokan, sia iatu mintu’ pangrampa napakatu lako datu Damsyik.

24

Moi nasidi’ri tu surodadu Aram, Nasorong duka PUANG tu surodadu lendu’ ia budanna tama limanna, belanna (iatu to Yehuda) umboko’imo PUANG, Kapenombanna nene’ to dolona. Naparampoimo ukungan tu Yoas.

25

Iatonna soro’mo tu tau dio mai kalena, sia natampe situang saki mandarra’na, sipakulu-kulumi tu to mase’ponna la umpatei, natumang rarana anakna Yoyada, to minaa; napateimi dao inan patindoanna, anna mate. Napeliangmi tau lan kotana Daud, apa tae’ nadipatama liangna mintu’ datu.

26

Inde sia tu to sipakulu-kulu la umpatei, iamotu: Zabad, anakna Simeat, misa’ baine to Amon, sia Yozabad, anakna Simrit, misa’ baine to Moab.

27

Iatu diona mintu’ anakna muane sia tu budanna kadanNa Puang Matua, tu umpokadai kumua la narampoi kasanggangan, sia kadipabendananna banuanNa Puang Matua, manassa iatu iannato tisura’mo lan Sura’ Umbattuananni sura’ diona mintu’ datu. Anna Amazia anakna muane, ussondai dadi datu.

Link: